Расія ўпершыню пачала распрадаваць залаты запас

• 20.11.2025, 15:20

Грошай на вайну не стае.

Банк Расіі ўпершыню прыступіў да рэальных продажаў фізічнага золата з рэзерваў у рамках аперацый Мінфіна па фінансаванні дзяржаўнага бюджэту.

ЦБ пачаў «адлюстроўваць» здзелкі з золатам Фонду нацыянальнага дабрабыту, якія праводзіць урад, паведаміла «Інтэрфаксу» прэс-служба рэгулятара.

Ідзецца пра продажы золата ФНБ, якія Мінфін ажыццяўляў у апошнія гады. Да нядаўняга часу гэтыя аперацыі былі віртуальнымі: урад прадаваў драгметал не на рынку, а Цэнтрабанку, дэ-факта перакладаючы залаты запас «з кішэні ў кішэню». У выніку зліткі заставаліся ў складзе залатых рэзерваў краіны, якія перавышаюць 2,3 тысячы тон і з'яўляюцца пятымі па памеры ў свеце.

Цяпер жа сітуацыя змянілася: ЦБ пачаў праводзіць рэальныя аперацыі па продажы фізічнага золата, як гэта ўжо робіцца з кітайскімі юанямі з ФНБ.

«Паколькі ліквіднасць унутранага рынку золата за апошнія гады ўзрасла, то ў сувязі з выкананнем бюджэтнага правіла і іншых аперацый ФНБ Банк Расіі здзяйсняе названыя эквівалентныя аперацыі на ўнутраным рынку не толькі шляхам куплі-продажу юаняў за рублі, але і часткова шляхам куплі-продажу золата», — патлумачылі ў Цэнтрабанку. Калі менавіта пачаліся продажы золата і ў якім аб'ёме, ЦБ не ўдакладніў.

Перад пачаткам вайны ў ФНБ было назапашана 405,7 тоны золата. З таго часу Мінфін распрадаў дзеля латання бюджэтных дзірак 57% гэтага запасу, або 232,6 тоны. У выніку на 1 лістапада 2025 года аб'ём золата ў фондзе знізіўся да 173,1 тоны. Агульны аб'ём ліквідных актываў у ФНБ, да якіх, акрамя золата, адносяцца кітайскія юані, скараціўся на 55% — з $113,5 млрд да $51,6 млрд. У адносінах да ВУП непатрачаныя запасы фонду сталі меншымі ў чатыры разы — 1,9% ВУП супраць 7,3% ВУП перад пачаткам вайны.