Трамп: Сі Цзіньпін разумее наступствы ўварвання на Тайвань

• 2.11.2025, 20:19

У Пекіне раней не выключылі прымяненне сілы для «ўз’яднання» з востравам.

Старшыня КНР Сі Цзіньпін ведае пра «наступствы» ваенных дзеянняў супраць Тайваня і не пачне ўварванне пры дзеючай адміністрацыі ЗША, заявіў у інтэрв’ю тэлеканалу CBS амерыканскі прэзідэнт Дональд Трамп.

«Яны разумеюць, што адбудзецца. Ён адкрыта гаварыў, і яго людзі адкрыта казалі на сустрэчах: «Мы ніколі нічога не зробім, пакуль прэзідэнт Трамп з’яўляецца прэзідэнтам», таму што яны ведаюць пра наступствы», — сказаў рэспубліканец.

Паводле яго слоў, тэма канфлікту не ўзнімалася на нядаўняй сустрэчы з Сі Цзіньпінам у паўднекарэйскім Пусане на палях саміту Азіяцка-Ціхаакіянскага эканамічнага супрацоўніцтва (АТЭС).

Раскрываць свой план на выпадак, калі Кітай уварвецца на востраў, Трамп у інтэрв’ю адмовіўся са словамі: «Я не магу выдаць свае сакрэты».