РФ страціла да 15% магчымасцей: генерал ацаніў удар па нафтаправодзе «Кальцавы»

• 2.11.2025, 12:39

Паражана адно з найважнейшых звёнаў для баявой актыўнасці войскаў ворага.

Ад нафтавай галіны ў РФ залежыць не толькі эканамічны складнік, але і ваенна-прамысловы комплекс акупантаў. Пра гэта ў эфіры «Суспільного» расказаў Мікалай Маламуж, былы кіраўнік Службы знешняй разведкі Украіны, генерал арміі, каментуючы ўдар ГУР па нафтапрадуктаправодзе «Кальцавы» ў Маскоўскай вобласці.

«У Расіі ўсё адладжана ў плане комплекснага забеспячэння рознымі сродкамі, асабліва лагістычныя шляхі, пастаўкі нафты. І ад гэтага залежыць вытворчасць зброі, боепрыпасаў, забеспячэнне войскаў і баявыя аперацыі. Знішчэнне гэтага вузла абясцэніць да 15% магчымасцей забеспячэння войскаў. І магчымы эканамічны складнік у месцы дыслакацыі», — сказаў Маламуж.

Ён адзначыў, што нафтаправод «Кальцавы» з’яўляецца адным з надзвычай важных звёнаў для баявой актыўнасці войскаў і патэнцыялу ваенна-прамысловага комплексу РФ.

«Гэта той фармат, які павінен дзейнічаць паралельна, маштабавацца па ўсёй тэрыторыі Расіі. І такія комплексы, асабліва пастаўкі нафты, — гэта непасрэднае забеспячэнне войскаў. Гэта адна цаглінка, якую вынялі з абараназдольнасці РФ», — дадаў Маламуж.