Нацбанк «прагаварыўся» пра сітуацыю з ростам цэн у Беларусі

• 2.11.2025, 10:37

Па кашальках людзей ударылі жыллёва-камунальныя паслугі, білеты на цягнікі, рытуальныя паслугі, мяса і малочныя прадукты.

Нацбанк прааналізаваў сітуацыю з інфляцыяй у Беларусі ў трэцім квартале гэтага года. Сярод іншага рэгулятар звярнуў увагу на сітуацыю з цэнамі на мяса і малочныя прадукты, піша «Зеркало».

Нацбанк адзначае, што інфляцыя ў ліпені — верасні запаволілася. «Гэтаму спрыяла аслабленне праінфляцыйнага ўплыву ўнутраных фактараў з боку спажывецкага попыту, дынамікі цэн вытворцаў і сфармаванага ўзроўню інфляцыйных чаканняў, — адзначае рэгулятар. — Таксама зменшыўся знешні цэнавы ціск у выніку запаволення інфляцыі ў Расійскай Федэрацыі пры ўмацаванні беларускага рубля, а таксама менш інтэнсіўнага росту сусветных цэн на асобныя імпартаваныя прадукты харчавання».

«Базавая інфляцыя (яе разлічваюць з улікам сезоннасці. — Заўв. рэд.) і адміністрацыйна рэгуляваныя цэны (тарыфы) ў гадавым вымярэнні змяніліся нязначна, — адзначае Нацбанк. — Менш інтэнсіўная дынаміка сезонных цэн на пладова-агароднінную прадукцыю абумовіла запаволенне тэмпаў росту спажывецкіх цэн».

Базавая інфляцыя складала 7,4% гадавых у чэрвені, а ў верасні — 7,5%.

Таксама ў Нацбанку звярнулі ўвагу на сітуацыю з цэнамі на мяса і малочныя прадукты.

«Запаволенне дынамікі цэн вытворцаў разам з аслабленнем спажывецкай актыўнасці спрыялі менш інтэнсіўнаму росту цэн па асобных харчовых пазіцыях, якія ў першым паўгоддзі даражэлі найбольш істотна (мяса, малако і прадукты з яго, кандытарскія вырабы)», — паведамляе рэгулятар.

Адміністрацыйна рэгуляваныя тарыфы ў верасні павялічыліся ў гадавым вымярэнні на 6% (у чэрвені — на 5,7%). Гэта больш, чым прагноз чыноўнікаў па інфляцыі ў цэлым на гэты год — да 5%.

«Гэта абумоўлена павышэннем тарыфаў на гарачае водазабеспячэнне, паслугі чыгуначнага пасажырскага транспарту рэгіянальных і міжрэгіянальных зносін, а таксама падаражаннем паштовых і рытуальных паслуг», — удакладнілі ў Нацбанку.