Літва датэрмінова адкрывае мяжу з Беларуссю

• 19.11.2025, 14:48

Пункты пропуску адкрыюць ужо заўтра.

Кабінет міністраў Літвы на сваім пасяджэнні 19 лістапада прыняў рашэнне адкрыць раней запланаванага тэрміну два пункты пропуску на мяжы з Беларуссю. Пра гэта паведамляе LRT.

Пункты пропуску пачнуць працаваць у чацвер, 20 лістапада.

«Улічваючы рашэнні Камісіі нацыянальнай бяспекі ад 18 лістапада гэтага года аб тым, што абставіны змяніліся, а абмежаванні на перасячэнне дзяржаўнай мяжы, устаноўленыя пастановай Урада Літвы ад 29 кастрычніка 2025 года (…), больш не з'яўляюцца неабходнымі для забеспячэння ўнутранай бяспекі, мэтазгодна зняць абмежаванні на перамяшчэнне праз пункты пропуску Літвы, устаноўленыя вышэйзгаданай пастановай», — заявіў міністр унутраных спраў Уладзіслаў Кандратовіч на пасяджэнні ўрада.

Нагадаем, 29 кастрычніка Літва закрыла мяжу з Беларуссю да 30 лістапада. Выключэнне было зроблена для дыпламатаў і грамадзян Літвы і ЕС, якія вяртаюцца дадому. Рашэнне было прынята ў адказ на з'яўленне ў паветранай прасторы краіны метэазондаў, якія, як заявілі літоўскія ўлады, выкарыстоўваюцца для кантрабанды і ствараюць пагрозу для грамадзянскай авіяцыі.