Сіноптыкі прадказалі найхаладнейшы месяц

• 19.11.2025, 14:12

Зроблены прагноз на наступную зіму.

Анлайн-рэсурс Severe Weather Europe, дзе публікуюць доўгатэрміновыя тэндэнцыі надвор'я, размясціў «канчатковы прагноз» на зіму 2025–2026 гадоў, у тым ліку для Еўропы і Беларусі. Судзячы па ўсім, найбольш халодным і снежным месяцам сезона будзе снежань.

У цэлым зіма 2025–2026 гадоў у Еўропе вымалёўваецца заўважна халаднейшай, чым чакалася раней. На атмасферныя працэсы адначасова ўплываюць два рэдкія фактары: слабая Ла-Нінья (кліматычная з'ява, звязаная са зніжэннем тэмпературы вады ў Ціхім акіяне) і незвычайна ранняе стратасфернае пацяпленне, якое аслабляе палярны віхор і адкрывае шлях арктычнаму паветру на поўдзень. У сукупнасці гэта стварае ўмовы для больш суровай зімы, найперш у паўночнай і цэнтральнай частках кантынента.

Ла-Нінья ўжо сфармавалася ў экватарыяльнай зоне Ціхага акіяна, і хоць яе ўплыў на Еўропу звычайна слабы, гістарычна такія гады часта прыводзілі да больш халоднай і нестабільнай зімы на поўначы і ў цэнтры рэгіёна. У папярэднія перыяды слабой Ла-Ніньі холад часцей прарываўся з Арктыкі, а ўстойлівыя антыцыклоны над Скандынавіяй узмацнялі марозныя эпізоды.

Ключавым фактарам гэтага сезона спецыялісты лічаць ранняе стратасфернае пацяпленне, якое чакаецца ў канцы лістапада. Такое здарэнне сустракаецца вельмі рэдка і парушае структуру палярнага віхра — сістэмы, якая ўтрымлівае холад над Арктыкай. Пры яго аслабленні марознае паветра выходзіць далёка на поўдзень, што ў мінулым ужо прыводзіла да халодных снежняў, як гэта было ў 1958, 1968 і 2000 гадах.

Снежань 2025 года пакуль выглядае як найбольш «зімовы» месяц сезона. Прагнозы ціску паказваюць фармаванне антыцыклону над поўначчу Еўропы і паніжанага ціску на поўдні, што запускае халодныя ўсходнія і паўночна-ўсходнія плыні. Тэмпературы ў заходняй, цэнтральнай і паўночнай Еўропе чакаюцца нармальнымі або ніжэй за норму, са значным павелічэннем снежнага покрыву — снегапады верагодныя ў Цэнтральнай Еўропе, Скандынавіі, Альпах, на Балканах і ў еўрапейскай частцы Усходняй Еўропы.

У студзені атмасферная карціна змяняецца, але не кардынальна. На большай частцы Еўропы захоўваюцца паўночныя і паўночна-ўсходнія плыні, аднак тэмпературны фон бліжэй да нормы. Месяц абяцае быць зменлівым: рэгулярныя халодныя перыяды, але без экстрэмальных маразоў, і менш ападкаў з-за дамінавання антыцыклона — то бок будзе суха і прахалодна.

У лютым Еўропа апынецца пад уплывам антыцыклона. У выніку тэмпература падымецца вышэй за норму ў большасці краін. Магчыма, месяц складзецца з двух розных фаз: халоднага пачатку і паступовага пацяплення да канца. Снегу больш стане на поўначы Еўропы, тады як поўдзень будзе адносна сухі.

У цэлым, згодна з прагнозам, зіма стартуе рэзка і з маразоў, дасягае піку ў снежні, утрымлівае прахалодны фон у студзені і змякчаецца да лютага. Галоўныя рысы сезона — ранні прыход зімы, частыя ўварванні арктычнага паветра і больш снежны снежань, чым звычайна, асабліва ў цэнтральных раёнах Еўропы.