Для беларускіх школьнікаў выпусцілі яшчэ адзін дзённік

• 19.11.2025, 13:19

Што ў ім трэба запаўняць?

Для беларускіх старшакласнікаў выпусцілі яшчэ адзін дзённік, які павінен дапамагчы вызначыцца з будучай прафесіяй. Пра гэта распавяла загадчыца кафедры псіхалогіі, зместу і метадаў выхавання Акадэміі адукацыі Наталля Залыгіна, перадаюць «Мінск-Навіны».

Прафарыентацыйны электронны дзённік размешчаны на адзіным адукацыйным партале і даступны вучням 9-х — 11-х класаў, настаўнікам і бацькам. Што прапануюць у ім запаўняць? Кожны месяц можна ў спецыяльных палях ставіць пазнакі пра наведаныя мерапрыемствы ў ВНУ і на кірмашах прафесій, пра праходжанне тэстаў на прафарыентацыю і пра сваю працоўную занятасць.

Але ў асноўным дзённік служыць метадычным дапаможнікам па выбары прафесіі: на яго старонках ёсць даведкі пра ВНУ Беларусі, статыстыка самых запатрабаваных спецыяльнасцяў і іншыя парады па паступленні.

Чакаецца, што гэты дзённік будзе запатрабаваны і атрымае шырокае распаўсюджанне ў школах і гімназіях краіны.