Польшча закрывае апошняе кансульства РФ

• 19.11.2025, 13:16

Варшава неаднаразова папярэджвала Маскву.

Польшча вырашыла закрыць кансульства Расіі ў Гданьску, апошняе з тых, што функцыянуюць у краіне, пасля дзвюх дыверсій на чыгуначнай дарозе паміж Люблінам і Варшавай.

Як паведамляе Onet, пра гэта заявіў міністр замежных спраў Польшчы Радаслаў Сікорскі.

Кіраўнік МЗС Польшчы адзначыў, што Варшава вызначылася з першымі мерамі пасля высноў следства па дыверсіях на чыгуначнай дарозе.

«Я вырашыў адклікаць згоду на дзейнасць апошняга расійскага кансульства – у Гданьску. Пра гэта будзе паведамлена расійскаму боку афіцыйнай нотай у бліжэйшыя гадзіны», – заявіў Сікорскі.

«Мы не плануем спыняць дыпламатычныя адносіны з Расіяй, як гэта робяць іншыя краіны пасля актаў тэрарызму або дыверсій», – дадаў ён.

Сікорскі падкрэсліў, што Варшава неаднаразова папярэджвала Маскву, што ў выпадку варожых дзеянняў у дачыненні да Польшчы адказам будзе далейшае скарачэнне яе дыпламатычнай і кансульскай прысутнасці ў краіне. Ён падкрэсліў, што Расія не толькі не спыніла такія спробы, але і актывізавала іх.