Сусветныя цэны на нафту працягваюць зніжацца

• 19.11.2025, 11:29

У Reuters назвалі прычыны.

Сусветныя цэны на нафту ў сераду знізіліся, паколькі павелічэнне запасаў у ЗША ўзмацніла занепакоенасць адносна лішняй прапановы.

Пра гэта паведамляе Reuters.

Паводле даных агенцтва, ф'ючэрсы на Brent патаннелі на 11 цэнтаў (0,2%) і склалі 64,78 долара за барэль пасля росту на 1,1% падчас папярэдніх таргоў. Кантракты на West Texas Intermediate страцілі 9 цэнтаў (0,2%), апусціліся да 60,65 долара за барэль пасля росту на 1,4% у аўторак.

Згодна з данымі Амерыканскага інстытута нафты (API), на якія спасылаюцца галінавыя крыніцы, мінулага тыдня ў ЗША павялічыліся запасы сырой нафты і нафтапрадуктаў. У справаздачы гаворыцца, што за тыдзень, які завяршыўся 14 лістапада, запасы нафты павялічыліся на 4,45 млн барэляў, бензіну — на 1,55 млн барэляў, а дыстылатаў — на 577 тысяч барэляў.

Старшы аналітык LSEG па нафце Эмрыл Джаміль адзначыў, што цэны трымаюцца ў дыяпазоне, бо рынак чакае эфекту ад санкцый супраць «Лукойла» і «Раснафты», якія пачнуць дзейнічаць 21 лістапада, хоць лішак прапановы аказвае ціск на зніжэнне.

Аналітыкі кітайскай брокерскай кампаніі Haitong Futures адзначаюць, што рынак дызельнага паліва падтрымлівае цэны на нафту, аднак працяглы лішак прапановы прымушае інвестараў уважліва ацэньваць перспектывы далейшага росту цэн.