Сястра прэзідэнта Філіпін абвінаваціла яго ў залежнасці ад какаіну

• 18.11.2025, 17:40

Паводле слоў жанчыны, гэта прывяло да праблем з кіраваннем краінай.

Адміністрацыя прэзідэнта Філіпін Фердынанда Маркаса-малодшага выступіла з абвяржэннем заявы ягонай сястры Імі Маркас пра залежнасць брата ад какаіну, якая, паводле слоў жанчыны, прывяла да праблем з кіраваннем краінай.

У адміністрацыі заявілі, што словы сястры могуць быць спробай адцягнуць увагу грамадскасці ад карупцыйнага скандалу, звязанага з яе калегамі ў Сенаце, піша The Guardian.

«Сенатар Імі, спадзяюся, вы праявіце патрыятызм і дапаможаце ў расследаванні, якое праводзіць ваш брат, і асудзіце ўсіх карупцыянераў», — цытуе выданне прэс-сакратарку прэзідэнта Клэр Кастра.

Раней па ініцыятыве кіраўніка астраўной дзяржавы была створана незалежная камісія для расследавання абвінавачанняў сенатараў і кангрэсменаў у атрыманні буйных хабараў ад будаўнічых кампаній за выгадныя кантракты на ўзвядзенне аб'ектаў для барацьбы з паводкамі. Высветлілася, што некаторыя праекты так і не былі рэалізаваны, застаўшыся на паперы.

Падчас мітынгу ў Маніле 17 лістапада сенатар Імі Маркас заявіла, што яе 68-гадовы брат пакутуе ад наркатычнай залежнасці яшчэ з часоў прэзідэнцтва іх бацькі — Фердынанда Маркаса-старэйшага, які кіраваў Філіпінамі ў 1965–1986 гадах і быў зрынуты ў выніку вайсковага перавароту.

Імі Маркас таксама абвінаваціла жонку і паўналетніх дзяцей дзеючага кіраўніка дзяржавы ў злоўжыванні наркотыкамі. Жанчына падкрэсліла, што перастала мець зносіны з братам з 2022 года, калі той стаў прэзідэнтам.