Беларуса з інваліднасцю па зроку высадзілі з цягніка
- 18.11.2025, 14:04
Разгарэўся скандал.
Хлопец, які мае інваліднасць па зроку і па законе права на бясплатны праезд, быў высаджаны познім вечарам у цемры на прыпынку сярод лесу. Білет каштаваў 57 капеек.
Інцыдэнт адбыўся ў дызельным цягніку «Гомель — Жлобін» яшчэ 17 ліпеня. Маці хлопчыка не згодная з тым, што ніхто за гэта не панёс адказнасці, пішуць «Сильные новости».
З яе слоў, хлопчык па законе мае права на бясплатны праезд — у яго інваліднасць па зроку. А білет каштаваў 57 капеек.
Калі ў цягнік зайшлі кандуктары-касіры, падлетак паказаў пасведчанне ў тэлефоне і пашпарт. Адна жанчына згадзілася з гэтым варыянтам, а другая, паводле слоў маці, сказала, што паколькі арыгінала дакумента няма, то і працягваць шлях хлопец не можа.
У выніку яго высадзілі а 21:50 на станцыі «Калінінскі».
Хлопчык скінуў геалакацыю бацькам, яго сустрэў бацька, але маці была шакаваная тым, што яе дзіця высадзілі ў цемры каля лесу.
Жанчына звярнулася ў службу падтрымкі чыгункі з просьбай даць пісьмовы адказ.
Пасля здарэння з імі звязалася тая самая касірка з просьбай уладзіць канфлікт, але маці не пайшла на саступкі.
Версія «БелЖД»
Праз нейкі час прыйшоў і пісьмовы адказ. У арганізацыі патлумачылі, што якасць фота была дрэнная, што не дазволіла пераканацца ў сапраўднасці дакумента.
«Касірка патлумачыла пасажыру, што пры сабе неабходна мець арыгінал пасведчання, якое дае права на льготы. Пакідаць вагон пасажыра не прасілі», — паведамілі ў БелЖД.
Таксама ў арганізацыі сказалі, што касірка толькі ўдакладніла, ці выходзіць хлопец на гэтай станцыі.
«Пры пад'ездзе да прыпынка «Калінінскі», пасля аб'явы машыніста, касірка паўтарыла для пасажыра, што цягнік прыбывае на гэтую станцыю, удакладніўшы, ці на гэтым прыпыначным пункце ён выходзіць. Пасажыр у гэты час размаўляў па тэлефоне, устаў і пачаў збіраць рэчы, узяў ровар і выйшаў з вагона», — агучылі сваю версію ў БелЖД.
Ніякіх парушэнняў з боку супрацоўніка ў арганізацыі не выявілі.
Маці падлетка з гэтым не згодная.
«Я патэлефанавала супрацоўніку, які займаўся «расследаваннем» гэтай сітуацыі, сказала, што ў лісце ні слова праўды няма, ён мне нахаміў, сказаў: «Жанчына, ідзіце ў царкву, сёння свята, а вы лаецеся», — распавяла яна.
Маці спытала пра камеру, якую носяць праваднікі, ёй адказалі — не працавала. Суразмоўца дадаў, што калі «адказ не задаволіў, звяртайцеся ў Мінск». «На гэтым усё і скончылася», — распавяла жанчына.