Кітай скараціў закупкі расійскай нафты на дзве траціны

• 18.11.2025, 13:38

Санкцый ЗША баяцца як дзяржаўныя кампаніі КНР, так і прыватныя пакупнікі.

Буйнейшыя дзяржаўныя кампаніі Кітая прыпынілі закупкі расійскай нафты ESPO, на якую прыпадае асноўная частка марскога экспарту з РФ у КНР, пасля ўвядзення Вашынгтонам санкцый супраць «Роснефти» і «Лукойла». Пазбягаць яе пачалі і некаторыя прыватныя перапрацоўшчыкі, звычайна больш талерантныя да рызык, пасля таго як Еўрасаюз і Вялікабрытанія ўключылі ў чорныя спісы НПЗ Shandong Yulong Petrochemical, які быў буйным пакупніком расійскай нафты. У сукупнасці гэта выклікала на кітайскім рынку неўласцівую яму трывогу, піша Bloomberg.

Паводле ацэнкі Rystad Energy, у лістападзе сярэднясутачны імпарт расійскай нафты ў Кітай можа знізіцца на 500 000–800 000 барэляў, або на дзве траціны ад звычайнага ўзроўню. З-за адмовы кітайскіх НПЗ прымаць нафту ESPO ў ранейшых аб'ёмах у рэгіёне ўтварыўся яе лішак, што цісне на цэны: гатунак (з улікам транспартных выдаткаў) цяпер прапануецца са зніжкай да эталонных марак у $4 за барэль, тады як напрыканцы кастрычніка яна складала 50 цэнтаў, а раней ESPO нярэдка прадаваўся і ўвогуле з прэміяй.

З'яўленне страху — тое, што адрознівае апошнія меры ЗША ад папярэдніх абмежаванняў, кажа Вандана Хары, заснавальніца сінгапурскай аналітычнай кампаніі Vanda Insights.

«Санкцыі ЗША ў дачыненні да «Роснефти» і «Лукойла» могуць у пэўнай ступені стаць пераломным момантам», — заявіла яна.

Нагадаем, у ноч на 23 кастрычніка Злучаныя Штаты ўвялі санкцыі супраць найбуйнейшых расійскіх нафтавых кампаній — «Роснефть» і «Лукойл». Мінфін ЗША таксама заклікаў Расію неадкладна пагадзіцца на спыненне агню.