Украіна пачала імпарт амерыканскага ЗПГ па новым маршруце

• 18.11.2025, 13:18

Праз тэрмінал у Клайпедзе.

Украіна імпартавала першую партыю звадкаванага прыроднага газу (ЗПГ) з ЗША праз тэрмінал у літоўскай Клайпедзе. Пра гэта піша Reuters.

З украінскага боку за пастаўкі адказвае прыватная энергетычная кампанія ДТЭК. Пастаўлены ва Украіну газ быў выраблены на заводзе ў Плакмінсе ў штаце Луізіяна. Аб’ём паставак быў эквівалентны 100 млн кубаметраў прыроднага газу, што дазваляе вытварыць адзін трыльён ват-гадзін энергіі.

Паводле Reuters, для забеспячэння патрэбаў Украіны ў цяпле ў зімовы перыяд неабходна імпартаваць каля 4 млрд кубаметраў прыроднага газу. Цяпер Украіна плануе нарошчваць пастаўкі звадкаванага прыроднага газу, у тым ліку праз Літву і Грэцыю.