Літва заявіла, што заўтра прыме рашэнне па мяжы з Беларуссю

• 18.11.2025, 11:01

Усё будзе залежаць ад вынікаў перамоў.

Урад Літвы на пасяджэнні 19 лістапада можа прыняць рашэнне па мяжы з Беларуссю. Такое меркаванне LRT выказаў старшыня Камітэта Сейма па замежных справах Рэмігіюс Мотузас.

Паводле яго слоў, рашэнне таксама будзе залежаць ад вынікаў перамоў з беларускім бокам на тэхнічным узроўні.

«Рашэнне будзе вызначацца, перш за ўсё, вынікамі тэхнічных перамоў. Але пакуль, зыходзячы з сітуацыі, тэндэнцыя хутчэй схіляецца да таго, што мяжы могуць быць адкрытыя раней за 30 лістапада. Канчатковае рашэнне будзе прынята з улікам высноў і рэкамендацый гэтых камісій, а таксама рашэнняў на заўтрашнім пасяджэнні ўрада», — сказаў ён.

Сёння ў Літве таксама павінны сабрацца Дзяржаўны савет абароны і Камісія нацыянальнай бяспекі.

Нагадаем, 30 кастрычніка ўрад Літвы прыняў рашэнне закрыць на месяц пункты пропуску Мядзінінкай (Каменны Лог) і Шальчынінкай (Беняконі) на мяжы з Беларуссю. Як паведаміў тэлеканал LRT, абмежаванні будуць дзейнічаць да 24:00 30 лістапада з магчымасцю іх падаўжэння.