Ключавыя ўкраінскія чыноўнікі раяць Зяленскаму звольніць Ермака

• 18.11.2025, 9:31

Сярод іх — Буданаў.

Ключавыя прадстаўнікі ўлады, набліжаныя да прэзідэнта Украіны Уладзіміра Зяленскага пасля рэзананснага расследавання НАБУ «Мідас» раяць яму звольніць кіраўніка Офіса прэзідэнта Андрэя Ермака, паведамляе «Украінская праўда».

У матэрыяле гаворыцца, што Зяленскі за апошні тыдзень правёў сустрэчы з ключавымі фігурамі з уладнай каманды, каб знайсці рашэнне, якое дазволіць стабілізаваць сітуацыю пасля абнародавання расследавання пра карупцыю ў энергетычным сектары.

Частка сустрэч была засведчаная публічнымі справаздачамі, напрыклад, размовы з прэм'еркай Юліяй Свірідэнкай, віцэ-прэм'ерам Міхаілам Фёдаравым, кіраўніком ГУР Кірылам Буданавым і таму падобнае.

«Як пераконваюць УП людзі, знаёмыя з ходам размоў на тых сустрэчах, большасць апытаных прэзідэнтам давалі розныя рэкамендацыі выхаду з крызісу, але амаль усе, не змаўляючыся, раілі замяніць кіраўніка Офіса прэзідэнта Андрэя Ермака», — гаворыцца ў матэрыяле.

Паводле слоў субяседніка УП сярод топаў «Слугі народа», у Радзе лягчэй палічыць людзей, якія б не прасілі адстаўкі Ермака.

«Зразумела, што няма прамога шантажу, але калі гэтага не адбудзецца, то фракцыя сама разваліцца», — заявіў адзін з крыніц.

У асяроддзі «слуг» сфармавалася свая «кааліцыя рашучых», якая пагражае нават выхадам з фракцыі, калі кіраўніка ОП не звольняць.