У Францыі мужчына знайшоў у сваім садзе золата на €700 тысяч

• 18.11.2025, 7:02

Ён атрымаў афіцыйны дазвол пакінуць знаходку сабе.

Француз знайшоў золата на €700 тысяч, калі выкапваў басейн у сваім садзе, піша LADBible.

Гаспадар, які валодаў домам усяго толькі год, вырашыў абнавіць участак і выкапаць катлаван пад басейн. Але замест звыклага пласта зямлі працаўнікі наткнуліся на некалькі шчыльна запячатаных пластыкавых пакетаў. Унутры аказаліся пяць залатых зліткаў і вялікая колькасць манет — усё акуратна упакавана, быццам схавана наўмысна.

Мясцовыя СМІ адзначаюць, што золата ляжала неглыбока, усяго ў некалькіх дзясятках сантыметраў ад паверхні. Мужчына адразу паведаміў пра сваю знаходку Рэгіянальнаму ўпраўленню па культурных справах, якое абавязана правяраць падобныя скарбы на археалагічную каштоўнасць, гістарычную значнасць і магчымае крымінальнае паходжанне.

Экспертыза ўстанавіла, што зліткі і манеты не з'яўляюцца археалагічным артэфактам: узрост знаходкі — прыблізна 15–20 гадоў. Кожны выраб быў забяспечаны індывідуальным нумарам, дзякуючы чаму ўлады змаглі адсачыць шлях золата і высветліць, што яно было пераплаўлена законнай кампаніяй у Ліёне. Злачыннага следу не выяўлена.

Хоць у Францыі ўсё, што можа адносіцца да археалогіі, падлягае абавязковаму дэклараванню, у дадзеным выпадку адыграў ролю іншы закон — Грамадзянскі кодэкс XIX стагоддзя, паводле якога «права ўласнасці на скарб належыць таму, хто выявіў яго на ўласнай зямлі, калі ніхто іншы не можа даказаць сваё права на яго».

Паколькі былога ўладальніка ўчастка ўжо няма ў жывых, прэтэндэнтаў на золата не знайшлося. Таму праз шэсць месяцаў праверак француз атрымаў афіцыйны дазвол пакінуць знаходку сабе.