«Гэта праблема, створаная рэжымам Лукашэнкі»
- 17.11.2025, 11:38
Літва заявіла, што яе грузавікі узяты ў закладнікі.
Тэхнічныя кантакты з беларускім бокам наконт літоўскіх грузавікоў, якія затрымаліся ў Беларусі, адбудуцца 18 лістапада. Пра гэта заявіў дарадца прэзідэнта Літвы па нацыянальнай бяспецы Дэйвідас Матуліёніс, піша LRT.
«Гэта праблема, па сутнасці, створаная рэжымам Лукашэнкі. Гэтыя грузавікі узяты ў закладнікі, і цяпер прапануецца весці перамовы, таму само слова „перамовы“ мне таксама не падабаецца. Заўтра, хутчэй за ўсё, адбудуцца тэхнічныя кантакты з беларускім бокам. У нас ёсць сваё бачанне, мы яго прадставім і паглядзім, як яны адрэагуюць. <�…> Калі з беларускага боку будзе добразычлівасць, магу запэўніць, што ніхто ў Літве не зацікаўлены працягваць закрыццё пунктаў пропуску праз мяжу», — сказаў Матуліёніс у эфіры LRT RADIO.
Пры гэтым Матуліёніс не бачыць падстаў праводзіць перамовы на ўзроўні МЗС, бо лічыць, што спачатку трэба дачакацца вынікаў тэхнічнай сустрэчы.
«Чаму мы павінны пераходзіць на ўзровень знешняй палітыкі? У нас ёсць канкрэтная праблема, яе трэба вырашыць, і ўсё стане на свае месцы. Цяпер спрабуюць стварыць вакол сітуацыі ўсялякія новыя праблемы, быццам мы за нешта адказныя, ствараючы ўражанне, што Літва закрыла пункты пропуску праз мяжу невядома чаму — іншы бок выдатна ведае, чаму яны былі закрытыя. Усё можна было вырашыць цягам некалькіх дзён, але гэтага зроблена не было. <�…> На тым баку, на Усходзе, часта бывае так: ствараецца праблема, а потым прапануецца яе вырашыць. Гэта нагадвае пэўную дзейнасць з выкарыстаннем рычагоў ціску, каб дамагчыся перамоваў. Але сёння я не бачу патрэбы пераходзіць да нейкіх далейшых перамоваў. Так, заўтра будзе сустрэча, паглядзім, як усё будзе выглядаць, і тады наш урад прыме найбольш разумнае рашэнне», — сказаў дарадца прэзідэнта Літвы.
Нагадаем, у Беларусі скупчылася больш як 1100 фураў літоўскіх перавозчыкаў. Рэжым Лукашэнкі не выпускае іх з краіны і пагражае канфіскаваць.