Сінер перамог Алькараса ў фінале Фінальнага турніру ATP

• 17.11.2025, 0:59

Італьянскі тэнісіст другі раз запар выйграў гэты турнір.

Другая ракетка свету, італьянец Яннік Сінер, абараніў тытул чэмпіёна Фінальнага турніру Асацыяцыі тэнісістаў-прафесіяналаў (ATP) у Турыне.

У фінале Сінер перамог лідара рэйтынгу ATP іспанца Карласа Алькараса з лікам 7:6 (7:4), 7:5.

Сінер, які ў Турыне не прайграў ніводнага матчу, атрымае прызавыя ў памеры $5,071 тыс. (рэкордныя для турніру).

Для італьянца гэта шосты трафей ATP у сезоне і 24-ы ў кар'еры.

Алькарас у гэтым годзе выйграў у Сінера чатыры з шасці фіналаў, у тым ліку на «Ралан Гарос» і US Open. Сінер перамог іспанца ў вырашальным матчы Уімблдона. Агульны лік у супрацьстаянні цяпер 10:6 на карысць іспанца.

Пасля паразы ў фінале US Open Сінер саступіў Алькарасу першае месца ў рэйтынгу, якое 3 лістапада вярнуў, але толькі на тыдзень.

Сінер трэці раз запар гуляў у фінале Фінальнага турніру ATP. У 2023-м ён саступіў сербу Ноўаку Джокавічу, а ў 2024-м — перамог амерыканца Тэйлара Фрыца.