Алек Болдуін адказаў каміку, які высмеяў яго «маянэзны» дом у Гэмптансе

• 16.11.2025, 21:30

Камік лічыць, што дом зоркі Галівуда надта сумны.

Акцёр Алек Болдуін уступіў у перапалку ў сацсетках пасля таго, як камік Дэн Махбубіян Розэн раскрытыкаваў яго дом у Гэмптансе, піша People (пераклад — сайт Charter97.org).

Ролік Розэна, апублікаваны ў Instagram, стаў рэакцыяй на публікацыю The New York Times, дзе быў паказаны фермерскі дом акцёра. Раней ён выкарыстоўваўся як дэкарацыі для рэаліці-шоў «Болдуін» («The Baldwins») з удзелам Болдуіна, ягонай жонкі Хіларыі і іх сямёрых дзяцей.

У відэа Розэн са сарказмам аглядае інтэр'ер, пачынаючы з кухні: «Як чалавек з такімі грашыма можа жыць у такім месцы?» — пытаецца ён. Камік жартуе, што нават кот «засынае ад нуды», а сама кухня нагадвае танныя дэкарацыі з каляднага фільма Hallmark.

Аглядаючы ванны пакой, Розэн заяўляе: «Гэта маянэз. Маянэзны ванны пакой». Паводле яго слоў, ва ўсім доме «няма нічога цікавага», а дзіцячая пляцоўка на вуліцы «мае больш характару, чым увесь інтэр'ер». «Я б жыў у гэтым гульнявым комплексе, а не ў доме», — дадае ён.

Нягледзячы на тое, што ролік сабраў мноства жартлівых каментарыяў, Болдуін не ацаніў гумар. Пад пастом ён напісаў: «Чаму б табе проста не сысці?» Хіларыя Болдуін адказала адзіным смайлікам са слязьмі ад смеху.