У Расіі схлусілі пра поспехі сваёй арміі ў Данецкай вобласці

• 16.11.2025, 10:51

У 93-й брыгадзе ЗСУ далі адказ.

У ЗСУ абверглі заяву расійскіх прапагандыстаў пра тое, што армія РФ нібыта прасунулася на поўнач ад вёскі Русін Яр у Данецкай вобласці. Пра гэта паведамілі ў 93-й асобнай механізаванай брыгадзе «Халодны Яр» у тэлеграме.

«Расійская прапаганда паведаміла, што акупанты прасунуліся на поўнач ад вёскі Русін Яр, у зоне адказнасці 93-й асобнай механізаванай брыгады «Халодны Яр». Скарыстаўшыся пагоднымі ўмовамі, а менавіта шчыльным туманам, праціўнік здзейсніў націск у напрамку ўкраінскіх пазіцый, разлічваючы, што нашы дроны будуць «сляпымі», — расказалі ў падраздзяленні.

Паводле слоў украінскіх вайскоўцаў, расіяне не ўлічылі, што найноўшыя наземныя робатызаваныя комплексы-разведчыкі ў момант штурмавых дзеянняў праціўніка ўжо стаялі ў ягоным тыле. Яны выявілі расійскія калёны, перадалі каардынаты, што, як адзначаецца, «зрабіла тэхніку салодкай цукеркай для нашых FPV».

«Нягледзячы на бесперапынны ціск ворага, халоднаярцы трымаюць пазіцыі. Усе падраздзяленні брыгады штодня выкладваюцца напоўніцу, і барацьба працягваецца», — дадалі ў 93-й брыгадзе.