«Вораг спынены і баіцца нечаканага ўдару»

• 15.11.2025, 17:14

Пра сітуацыю на Паўднёвым напрамку расказаў украінскі генерал.

Сілы абароны Украіны былі вымушаныя адысці з некаторых пазіцый у Запарожскай вобласці. Гэта было зроблена з мэтай захавання жыцця асабовага складу. Украінскія вайскоўцы працягваюць даваць адпор расійскім захопнікам на фронце. Яны займаюць усе пануючыя вышыні паблізу Запарожжа.

Пра гэта паведаміў генерал арміі Украіны, былы кіраўнік Службы знешняй разведкі Украіны (2005–2010 гг.) Мікалай Маламуж.

Расіяне павялічваюць інтэнсіўнасць штурмаў на Запарожскім напрамку. Сітуацыя застаецца даволі складанай.

— На Паўднёвым фронце вельмі цяжкая сітуацыя. Мы свайго часу аслабілі шэраг пазіцый на Гуляйпольскім напрамку і на іншых напрамках, якія могуць наблізіць ворага да Запарожжа. Але важна, што цяпер мы ўтрымліваем вышыні — гэта наша перавага. Калі вораг захопіць у трох сектарах пануючыя вышыні, то ён атрымае магчымасць наносіць агнявыя ўдары па горадзе Запарожжы ўсімі сродкамі, — адзначыў генерал.

Таму, паводле яго слоў, украінскія вайскоўцы робяць усё магчымае, каб утрымліваць гэтыя вышыні пад кантролем. Яны важныя для абароны.

— У ворага было прасоўванне ў трох населеных пунктах Запарожскай вобласці, мы яго спынілі, правялі шэраг зачыстак, зрабілі «шэрыя зоны», каб праціўнік зайшоў у вёску, але пасля быў адтуль выбіты. Цяпер ён не можа далей прасоўвацца. Аднак быў заход на вышыню. Раней шэраг расійскіх падраздзяленняў знаходзіўся ў нізінах. Цяпер з занятых пазіцый мы павінны знішчыць ворага, каб ён не меў магчымасці рухацца далей, — падкрэсліў спікер.

Узброеныя Сілы Украіны (ЗСУ) узмацняюць сваю групоўку ў Запарожскай вобласці.

«Раней у нас тут было недастаткова рэсурсаў, скажу прама, нават жывай сілы. Цяпер падцягваюцца моцныя ўдарныя групы, і ўжо ёсць стабілізацыя сітуацыі. Я думаю, выкарыстоўваючы агнявыя сродкі, будзем ствараць вельмі магутныя ўдарныя магчымасці, каб знішчыць новыя рэзервы, якія вораг падцягнуў на гэты напрамак. Мы не дазволім ім прасунуцца на аператыўна выгадныя пазіцыі і наблізіцца да горада Запарожжа», — рэзюмаваў Маламуж.