Як пазбегнуць дыябету: тры простыя правілы
- 15.11.2025, 15:57
Гэта магчыма для паловы людзей са схільнасцю.
Цукровы дыябет 2-га тыпу пагражае мільёнам людзей у свеце. Высокі ўзровень цукру ў крыві можа прывесці да сур'ёзных ускладненняў, у тым ліку да захворванняў нырак і праблем з нагамі. Спецыялісты раскрылі тры ключавыя змены ў распарадку дня, якія могуць прадухіліць з'яўленне гэтага небяспечнага дыягназу.
Пра гэта піша The Mirror.
Арганізацыя «Diabetes UK» заяўляе, што спалучэнне трох важных змен у ладзе жыцця можа знізіць рызыку развіцця цукровага дыябету 2-га тыпу прыблізна на 50%.
Эксперты назвалі тры асноўныя спосабы прафілактыкі гэтага захворвання:
правільнае харчаванне;
фізічная актыўнасць;
пахуданне, калі вы пакутуеце на атлусценне.
Брытанскія спецыялісты сцвярджаюць: палова людзей, якім пагражае цукровы дыябет 2-га тыпу, могуць пазбегнуць хваробы або адкласці яе, калі будуць правільна харчавацца, сачыць за вагой і аб'ёмам таліі. Таксама важна рэгулярна займацца спортам і проста больш рухацца на працягу дня.
Спецыялісты раяць хутка хадзіць або выконваць іншыя практыкаванні цягам 30 хвілін пяць разоў на тыдзень. Калі часу мала — варта падзяліць гэтыя 30 хвілін на тры кароткія 10-хвілінныя прамежкі.
Спецыялісты адзначаюць, што працяглае сядзенне або ляжанне таксама павышае рызыку ўзнікнення дыябету, таму яны раяць часцей уставаць, рабіць расцяжкі і больш рухацца, нават калі вы сядзіце за сталом або глядзіце тэлевізар.
Таксама яны раяць аддаваць перавагу здароваму харчаванню: выбіраць напоі без дададзенага цукру; ужываць ежу, багатую на вугляводы і клятчатку, такую як макароны з цэльнай пшаніцы; скараціць спажыванне чырвонага або перапрацаванага мяса.
Што да фізічнай актыўнасці, дабрачынная арганізацыя прапануе больш шпацыраваць.
«Калі пэўны час не былі актыўнымі, пастаўце сабе рэалістычныя мэты, такія, як 10-хвілінная прагулка пасля прыёму ежы», — адзначылі спецыялісты.
Згодна з парадамі Нацыянальнай службы здароўя (NHS), дарослым людзям ва ўзросце ад 19 да 64 гадоў трэба займацца не менш як 2,5 гадзіны на тыдзень пры ўмеранай нагрузцы (напрыклад, хуткая хада). Альбо можна 1 гадзіну 15 хвілін займацца інтэнсіўна (напрыклад, бег). Лепш за ўсё размеркаваць гэтыя трэніроўкі на 4–5 дзён цягам тыдня.
Як адзначаюць спецыялісты, гэтыя простыя змены вашага ладу жыцця могуць знізіць рызыку развіцця цукровага дыябету 2-га тыпу. Аднак яны адзначаюць, што не кожны фактар рызыкі можа знаходзіцца пад вашым кантролем.