Візавы цэнтр Італіі пачаў анлайн-рэгістрацыю жывой чаргі

• 14.11.2025, 17:57

Ужо паступіла больш за тысячу заявак.

Анлайн-запіс у жывую чаргу візавага цэнтра адноўлены, паведамілі у прэс-службе ўстановы.

Раней ужо называлася дата гэтай падзеі — 14 лістапада 2025 года.

Каб атрымаць нумар у спісе чакання жывой чаргі, неабходна накіраваць запыт на электронную пошту цэнтра. У ім трэба ўказаць лацінскімі літарамі (як у пашпарце) прозвішча і імя, тэлефон, электронную пошту і нумар групы / M-нумар.

«Пасля адпраўкі карэктнага запыту вы атрымаеце адказ з запрашэннем на вочную верыфікацыю ў візавым цэнтры ў Мінску са ўказаннем даты і часу», — сказана ў паведамленні.

Калі ўсе працэдуры пройдзены паспяхова, заяўніку прысвойваецца нумар у спісе чакання жывой чаргі. Пры невыкананні ўмоў заяўку адхіляць. Падаць заяўку могуць толькі тыя, у каго няма доўгатэрміновай (больш за тры месяцы) шэнгенскай візы.

У візавым цэнтры звярнулі ўвагу, што датэрмінова ўжо атрымана больш за 1000 лістоў. Запыты, адпраўленыя да афіцыйнай даты пачатку працэдуры, анулююць без разгляду.

Апрацоўка заявак можа заняць да некалькіх тыдняў. Некалькі пададзеных заявак зарэгіструюць як адну, прычым з самай позняй датай. У выпадку ўзнікнення пытанняў трэба звяртацца толькі праз кол-цэнтр або форму зваротнай сувязі.