ГУР паралізавала Транссібірскую магістраль

• 14.11.2025, 16:38

Цягнік сышоў з рэек.

Галоўнае ўпраўленне разведкі Мінабароны Украіны правяло спецаперацыю, у выніку якой у Хабараўскім краі РФ на Транссібірскай магістралі сышоў з рэек грузавы цягнік, што прывяло да спынення руху. Пра гэта паведамляе ГУР.

Паводле дадзеных разведкі, выбух прагрымеў 13 лістапада паблізу населенага пункта Сасноўка на ўчастку Транссібірскай магістралі — галоўнай лагістычнай артэрыі РФ, якая выкарыстоўваецца для транспартавання зброі і боепрыпасаў, у тым ліку атрыманых з тэрыторыі КНДР. У выніку аперацыі пад адхон сышоў грузавы цягнік і было пашкоджана чыгуначнае палатно.

ГУР апублікавала відэакадры, якія дэманструюць падрыхтоўку аперацыі.

У ведамстве заявілі, што расійскія спецслужбы «чарговы раз дэманструюць сваю няздольнасць забяспечыць эфектыўны кантроль нават над найбольш крытычнымі для акупантаў інфраструктурнымі аб’ектамі».

У разведцы таксама адзначылі, што праца над знішчэннем лагістычных магчымасцяў праціўніка працягваецца.