Аліеў адрэагаваў на ўдар РФ, у выніку якога пацярпела пасольства Азербайджана

• 14.11.2025, 15:39

Прэзідэнт Азербайджана пагаварыў з Зяленскім.

Прэзідэнт Азербайджана Ільхам Аліеў асудзіў расійскі начны ўдар па Украіне, у выніку якога пацярпела пасольства Азербайджана.

Аб гэтым заявіў прэзідэнт Украіны Уладзімір Зяленскі па выніках размовы з азербайджанскім калегам.

«Гаварыў з прэзідэнтам Азербайджана Ільхамам Аліевым. Дзякуй за падтрымку і спачуванне нашым людзям», — паведаміў ён.

Зяленскі адзначыў, што расійскія захопнікі ўжылі гэтай ноччу супраць украінцаў сотні дронаў і ракеты, у тым ліку балістычныя.

«На жаль, ёсць разбурэнні і пашкоджанні, пашкоджана і пасольства Азербайджана. Спадар прэзідэнт асудзіў гэты ўдар і падкрэсліў, што гэта не ўпершыню расіяне цэляцца і ў будынак пасольства, і ў іншыя аб’екты, звязаныя з Азербайджанам», — адзначыў украінскі лідар.

Акрамя таго, прэзідэнты дзвюх дзяржаў абмеркавалі двустароннія адносіны і развіццё партнёрства.

«Сапраўды ёсць зялёнае святло па ўсіх кірунках двустаронняга супрацоўніцтва. Ёсць добры патэнцыял, і мы будзем яго рэалізоўваць», — дадаў Зяленскі.