Payoneer закрывае доларавыя рахункі ў Беларусі

• 14.11.2025, 11:53

Плацежны сэрвіс увёў абмежаванні для беларусаў.

Міжнародная сістэма плацяжоў Payoneer больш не будзе праводзіць пералічэнні на доларавыя рахункі ў Беларусі. Пра гэта сэрвіс папярэдзіў карыстальнікаў, паведамляюць кліенты ў профільным чаце «Payoneer Мінск Беларусь», піша «Зеркало».

Міжнародная плацежная платформа Payoneer паведаміла беларускім карыстальнікам, што доларавыя банкаўскія рахункі ў Беларусі больш не падтрымліваюцца. У рассылцы ўдакладняецца, што такія меры прынятыя, «каб пазбегнуць няўдалых трансакцый». У выніку доларавыя рахункі беларусаў больш недаступныя — кліентам параілі выбраць еўра.

Работа ў гэтай валюце працягваецца ў штатным рэжыме: на такія рахункі можна адпраўляць сродкі наўпрост з любых даступных балансаў, уключаючы долары або фунты стэрлінгаў, — з аўтаматычнай канвертацыяй валют. Карыстальнікам рэкамендавана абнавіць рэквізіты пастаўшчыкоў або падрадчыкаў, калі раней быў пазначаны доларавы банкаўскі рахунак у Беларусі, замяніўшы яго на еўравы.

У Беларусі карыстацца карткай Payoneer для зняцця грошай могуць толькі рамеснікі і самазанятыя. Юрыдычныя асобы і індывідуальныя прадпрымальнікі павінны выводзіць грошы з уліковага запісу Payoneer толькі на свой банкаўскі рахунак.

Акрамя гэтага, платформа не працуе з некаторымі беларускімі банкамі, якія трапілі пад санкцыі Захаду. Раней сэрвіс забараніў рэгістрацыю новых уліковых запісаў з Беларусі, пакінуўшы такую магчымасць для грамадзян нашай краіны, якія маюць легальны статус у краінах ЕС і іншых дзяржавах.