Сілам абароны Украіны ўдалося спыніць прасоўванне расіян у раёне Гуляйполя

• 13.11.2025, 19:49

Цяпер вядзецца комплекснае агнявое паражэнне ворага.

Сілы абароны Украіны спынілі прасоўванне расійскіх акупантаў у раёне Гуляйполя Запарожскай вобласці. Пра гэта 13 лістапада ў каментары «Інтэрфакс-Украіна» паведаміў спікер сіл абароны поўдня Уладзіслаў Валошын.

«Сілам абароны Украіны ўдалося спыніць прасоўванне ворага. Цяпер адбываецца блакіраванне яго перамяшчэння, а таксама комплекснае агнявое паражэнне ворага. Сілы абароны Украіны актыўна праводзяць ударна-пошукавыя дзеянні, бо праціўнік працягвае інфільтрацыйныя дзеянні, спрабуе скрыта пранікаць у глыбіню ўкраінскай абароны», – расказаў Валошын.

Па яго словах, сітуацыя на гуляйпольскім напрамку даволі няпростая, як і на Аляксандраўскім і Арэхіўскім.

«Праціўнік спрабаваў увесці групы замацавання ў тыя населеныя пункты, з якіх сілы абароны адышлі на больш выгадныя пазіцыі. Акрамя таго, праціўнік працягвае актыўнае агнявое ўздзеянне на ўкраінскія пазіцыі», – адзначыў Валошын.

Ён праінфармаваў, што найбольш актыўным на поўдні застаецца Аляксандраўскі напрамак.