Расійскі Арол атакавалі ракеты «Фламінга»

• 13.11.2025, 15:08

Над горадам прайшоў «вогненны дождж».

У ноч на 13 лістапада расійскі горад Арол атакавалі ракетамі ўкраінскай вытворчасці «Фламінга», якія расійская СПА збівала проста пасярод жылых кварталаў, піша «Фокус».

З-за гэтага абломкі крылатай ракеты падалі непасрэдна ў двор мясцовых жыхароў, што відаць на відэа, апублікаваным у тэлеграм-канале «Exilenova+».

«Арол. Тыя самыя абломкі», — гаворыцца ў подпісе да відэа, на якім відаць, як у небе над жылым кварталам лётаюць палаючыя часткі збітай мэты. Гэтыя абломкі падаюць у двор побач з жылымі шматпавярхоўкамі і прыпаркаванымі аўтамабілямі.

Як сцвярджае тэлеграм-канал «Supernova+», абломкі збітай мэты — гэта «абломкі фламінгіча» (ад назвы ўкраінскай крылатай ракеты вялікай далёкасці «Фламінга»).

Губернатар Арлоўскай вобласці Андрэй Клічкоў пацвердзіў, што ў рэгіёне абвешчаная менавіта ракетная небяспека.

«У Арлоўскай вобласці абвешчаная ракетная небяспека! Калі вы знаходзіцеся дома, схавайцеся ў памяшканнях без вокнаў з суцэльнымі сценамі: у калідоры, ваннай, кладоўцы. Калі вы на вуліцы — зайдзіце ў найбліжэйшы будынак або адпаведнае сховішча», — напісаў Клічкоў.

Варта адзначыць, у Арле знаходзіцца некалькі нафтабаз.

Таксама ў Арле размешчаная вайсковая база, з якой войскі РФ запускаюць па Украіне іранскія дроны тыпу «Шахед». Гэта база мае 8 пускавых пляцовак на зямлі і ўчастак дарогі даўжынёй 2,8 км, дзе дроны могуць запускацца з транспартных сродкаў.

Горад размешчаны на адлегласці каля 150 км ад паўночна-ўсходняй мяжы Украіны.