Лаўроў знайшоў «вінаватых» у сваіх правалах

• 13.11.2025, 8:24

Азвучана дзіўная «версія» зрыву саміту ў Будапешце.

Расія па-ранейшаму «гатовая да саміту ў Будапешце». Пра гэта заявіў міністр замежных спраў Расіі Сяргей Лаўроў у інтэрв'ю італьянскай газеце Corriere della Sera, урыўкі з якога апублікавала расійскае агенцтва ТАСС.

«Мы разлічваем на здаровы сэнс і на тое, што ў Вашынгтоне ўстрымаюцца ад дзеянняў, якія могуць эскалаваць канфлікт на новы ўзровень», — заявіў Лаўроў.

Больш за тое, Лаўроў назваў «прычыну», чаму саміт у Будапешце быў раптоўна адменены пасля яго размовы з дзяржсакратаром Маркам Рубіо.

«Трамп атрымліваў «закулісныя даклады», пасля чаго не адбылася сустрэча на найвышэйшым узроўні з РФ у Будапешце», — заявіў ён.

Паводле слоў Лаўрова, амерыканскі прэзідэнт падтрымлівае ідэю неадкладнага спынення агню ва Украіне з фіксацыяй сіл на бягучых пазіцыях. Масква ж настойвае, каб Кіеў саступіў дадатковыя тэрыторыі.

Кіраўнік МЗС РФ таксама рэзка выказаўся ў адрас Еўропы, абвінаваціўшы яе ў «зрыве мірных ініцыятыў».

Гэтыя каментары Лаўрова спачатку былі часткай інтэрв'ю італьянскай штодзённай газеце Corriere della Sera. Аднак, паводле дадзеных Reuters, італьянская газета адмовілася публікаваць інтэрв'ю.