Канада ўвяла новыя санкцыі супраць РФ

• 12.11.2025, 23:54

У спісы дадалі 100 суднаў ценявога флоту.

Канада ўвяла новыя санкцыі супраць Расіі з-за яе вайны супраць Украіны. Пра гэта паведаміла міністр замежных спраў Канады Аніта Ананд, яе цытуе сайт урада.

У санкцыйны спіс дадалі 13 фізічных і 11 юрыдычных асоб, у прыватнасці датычных да распрацоўкі і разгортвання расійскай праграмы беспілотнікаў.

«Упершыню Канада таксама ўвяла санкцыі супраць арганізацый, якія пастаўляюць кібераінфраструктуру, што выкарыстоўваецца ў расійскіх гібрыдных стратэгіях супраць Украіны», – гаворыцца ў паведамленні.

Санкцыі таксама ўжылі да некалькіх расійскіх кампаній, што займаюцца звадкаваным прыродным газам. Пакет таксама прадугледжвае абмежаванні супраць 100 суднаў з ценявога флоту Расіі, усяго цяпер іх у санкцыйных спісах Канады ўжо больш за 400.