Бітвы за месца ў чарзе на мяжы Польшчы і Беларусі выйшлі на новы ўзровень
- 12.11.2025, 21:30
Канфлікт у чарзе скончыўся шакавальным наездам на жанчыну.
Шматгадзінныя і шматдзённыя чэргі на польска-беларускай мяжы давялі вадзіцеляў да кропкі кіпення. Канфлікт на польскай дарозе з-за месца ў чарзе скончыўся шакавальным наездам на жанчыну, а відэа з інцыдэнтам разляцелася па сацсетках, піша «Тэлеграф».
Навіна пра інцыдэнт, які мяжуе з замахам на наўмыснае забойства, скалыхнула чаргу на выезд з Польшчы ў Беларусь, даўно ператвораную ў зону напружанага супрацьстаяння. Аўтамабіль збіў жанчыну, якая, паводле звестак з чата дапамогі пры праходжанні мяжы, спрабавала перашкодзіць вадзіцелю ўлезці ў сярэдзіну шматкіламетровай калоны тых, хто чакае праезду праз пункт пропуску.
Відэа з месца здарэння зафіксавала наступствы падзеі. Падобна на тое, легкавы аўтамабіль з беларускімі нумарамі першага рэгіёна, нягледзячы на прысутнасць жанчыны перад ім, працягнуў рух. Дзяўчына апынулася на асфальце. «Чалавека збілі!» — чуваць на відэа і бачна, як да месца здарэння збягаюцца сведкі.
Як пазней паведамілі карыстальнікі ў чате, «вадзіцеля забралі стражы на разбор палётаў».
Гэты інцыдэнт — толькі вяршыня айсберга сістэмнага крызісу, які пануе на польскай мяжы. Шматгадзінныя, а часам і шматдзённыя чэргі нарадзілі ценевы бізнес па продажы месцаў.
«Трымаць кальцо!»: Барацьба з «толікамі»
Праблема выйшла далёка за межы бытавых сварак. Вадзіцелі вымушаныя арганізоўваць уласныя сістэмы абароны супраць так званых «толікаў» – прадпрымальных вадзіцеляў, якія займаюць чаргу, каб потым прадаць сваё месца іншым.
У чатах час ад часу гучаць заклікі да самарганізацыі: «Трымаць кальцо! Інакш толікі не дадуць выехаць пасля кальца да ранку. А тым, хто пасля кальца, дык тады ўвогуле не пазайздросціш», – піша адзін з вадзіцеляў.
Іншы дзеліцца тактыкай, што нагадвае франтавыя зводкі: «Пасля кальца ніхто не ўлез за апошнія 2 гадзіны. За тымі, хто спіць, таксама людзі ходзяць назіраюць, так што, калі трымаць кальцо, то ўсё будзе як след».
Аднак не ўсе гатовыя да калектыўнай барацьбы, што толькі пагаршае сітуацыю. «Яны заўсёды будуць ўлезаць і нічога ніхто не зробіць. Калі мы, некалькі чалавек, выходзілі, “мужчыны” сядзелі ў асноўным у сваіх аўто і жэрлі сваё смуроднае сала», – з адчаем каментуе трэці ўдзельнік чата, скардзячыся на пасіўнасць суседзяў па чарзе.
Відэа з наездам выклікала бурную рэакцыю. Хоць дзеянні вадзіцеля ніхто не апраўдвае, некаторыя ў каментарыях выказваюць разуменне таго адчаю, які гадамі назапашваецца ў людзей у гэтых чэргах.
«Яго не апраўдваю. Але думаю, пасля гэтага выпадку палякі возьмуцца за хаджэнне ўздоўж чаргі, давядзецца стаяць у чарзе і не высоўвацца з машыны», – выказаў надзею адзін з вадзіцеляў.
Аднак, як адзначыў іншы каментатар, вадзіцелю-парушальніку ў нейкай меры ўдалося дасягнуць сваёй мэты: «Мужчыне ўсё ж удалося ўлезці ў чаргу». Дык польская паліцыя яго адпусціла?