Знойдзены Шэўрале, які амаль 50 гадоў ездзіць на дровах

• 12.11.2025, 10:17

Гэта адзінае ў сваім родзе аўто ў Бразіліі.

У Бразіліі знайшлі незвычайны Шэўрале 1952 года. Амаль паўстагоддзя ў яго не залівалі бензін, бо аўто працуе на дровах.

Вінтажны Chevrolet Styleline Deluxe абсталяваны нетыповай сілавой устаноўкай, якая без праблем працуе не адзін дзясятак гадоў. Пра гэта паведамляе сайт Autogeek.

Нестандартны цюнінг Шэўрале выканаў яго ўладальнік Арнольдо Шміт з сынам Элемерам у 1977 годзе. Пераробка аўто заняла шэсць месяцаў — працавалі па начах і ў выходныя.

У багажнік Chevrolet Styleline Deluxe устанавілі газагенератар. У выніку спальвання ў ім дроў утвараецца газ, які і паступае ў 3,6-літровы рухавік магутнасцю 105 к.с. То-бок, гэта свайго кшталту аналаг аўто з ГБО.

Запасу дроў хапае прыкладна на 80 км прабегу. Гэтае паліво істотна таннейшае за бензін, таму аўто на дровах эканоміць сродкі.

Гэты Шэўрале — адзінае аўто на дровах у Бразіліі.