Раскрыта таямніца трох сакрэтных пакояў Пуціна

• 12.11.2025, 8:24

Яны знаходзяцца ў розных рэзідэнцыях.

Для расійскага дыктатара Уладзіміра Пуціна пабудавалі тры амаль аднолькавыя кабінеты ў трох розных рэзідэнцыях, каб хаваць яго рэальнае месца знаходжання.

Пра гэта паведамляе следчы праект «Радыё Свабода» і «Настоящее время» «Сістэма».

Журналісты выявілі доказы, што ў рэзідэнцыях Пуціна «Бачараў Ручай» у Сочы і «Валдай» у Ноўгарадскай вобласці пабудавалі копіі яго працоўнага кабінета ў падмаскоўнай рэзідэнцыі «Нова-Агарова». Дыктатар праводзіць у іх сустрэчы і нарады, але Крэмль замоўчвае, што гэта розныя месцы: усе кабінеты афіцыйна паказваюць як «Нова-Агарова».

Асноўныя доказы таго, што кабінетаў насамрэч тры: ручка на дзвярах, дэкаратыўная лінія на сцяне і папка для папер.

Гісторыя гэтых кабінетаў і перамяшчэнняў Пуціна паміж імі паказвае, як змянялася яго стаўленне да ўласнай бяспекі і як з гадамі ён перанёс кіраванне дзяржавай да сябе дадому.

Арыгінальны кабінет Пуціна быў абсталяваны ў яго рэзідэнцыі ў падмаскоўнай «Нова-Агарова» ў 2015 годзе, але ўжо праз год пачалося будаўніцтва тайных копій гэтага пакоя, высветлілі журналісты. Фота і відэа з кабінета на Валдаі з’яўляюцца з 2018 года, а з кабінета ў Сочы — з 2020.

«За адзін дзень Пуцін можа здымацца ў кабінеце з адным рамонтам, потым — у тым жа кабінеце, але з іншым «рамонтам», і, нарэшце, зноў у ранейшым», — адзначаюць аўтары праекта.

Таксама яны высветлілі, што са студзеня 2024 года расійскі дыктатар перастаў карыстацца сочынскім кабінетам з-за пагрозы атакі беспілотнікаў, а з пачатку 2025 года — кабінетам у «Нова-Агарова».

Але з сярэдзіны верасня 2025 года Пуцін зноў пачаў час ад часу вяртацца ў гэтыя рэзідэнцыі, гаворыцца ў расследаванні.

Сакрэтныя бункеры Пуціна

Раней стала вядома пра сакрэтныя бункеры Пуціна.

Паводле дадзеных журналісцкіх расследаванняў, у цэнтры Масквы існуе цэлая сетка бункераў. Яны знаходзяцца пад зямлёй, а глыбіня тунэляў дасягае 200 метраў. Дыгеры выпадкова трапілі ў адзін з такіх тунэляў і распавялі пра тое, што ўбачылі. За гэта іх арыштавалі, прысудзілі ўмоўныя і рэальныя тэрміны, а пасля яны былі вымушаныя пакінуць Расію.

На поўдні Расіі ў Пуціна ёсць велізарная сядзіба ў Геленджыку. Там знаходзяцца велізарны палац, царква, вінавы склеп, уласнае казіно, дэндрарый, каток для хакея. Участак на скале з выглядам на Чорнае мора надзейна схаваны ад людскіх вачэй вялізным лесам і закрытай для палётаў зонай.

Паводле слоў спецыялістаў, бункеры і тунэлі пабудаваныя вельмі граматна — там ёсць свая сістэма падачы чыстага паветра, вады, ацяплення. Ёсць абарона ад пажараў, магчымай хімічнай небяспекі. І тунэлі злучаныя з дарогай, па якой можна падвозіць запасы.