Зачыстка беларускага рынку таксі працягнулася ў Гомелі і Мазыры

• 11.11.2025, 15:11

Сілавікі заявілі пра фіктыўныя фірмы і ўхіленне ад уплаты падаткаў.

Сілавікі следам за сталіцай працягваюць чысціць шэрагі таксістаў у рэгіёнах. Тых, хто выкарыстоўвае для ўхілення ад падаткаў фірмы-аднадзёнкі і раздрабненне бізнесу.

У іх прыцэле гэтым разам апынуліся 2 бізнес-групы таксістаў Гомельскай вобласці, ад якіх у бюджэт не паступіла больш за 6,2 млн рублёў, — паведамляе «Першы інфармацыйны».

У адной з груп, што дзейнічала ў Гомелі, на падстаўных асоб было створана 17 фірм, а ў схему было ўцягнута 400 аўтамабіляў і больш за 500 кіроўцаў.

«Пасля арганізацыі рэгістрацыі лжэструктур былі заключаны эфектыўныя дагаворы арэнды паміж лжэструктурамі і суб’ектамі гаспадарання рэальнага сектара эканомікі. Гэта дазваляла суб’ектам рэальнага сектара эканомікі пералічваць атрыманую выручку ад аказаных паслуг на разліковыя рахункі лжэструктур, дзе гэтыя грашовыя сродкі ўтойваліся ад падаткаабкладання. У наступным грошы, што паступілі на разліковыя рахункі лжэструктур, абнаяўляліся. Сума абнаяўленых грашовых сродкаў складала каля 70 % ад агульнай выручкі», — распавёў прадстаўнік УДФР Камітэта дзяржкантролю Беларусі па Гомельскай вобласці Андрэй Сеннікаў.

Астатнія 30 % вярталіся тым жа фірмам перавозчыкаў, але ўжо ў выглядзе платы па фіктыўных дагаворах арэнды аўтамабіляў.

Шкода дзяржаве ў межах дзейнасці гэтай бізнес-групы склала 3,7 млн рублёў.

Яшчэ адна структура была разаблачаная ў Мазыры, дзе дырэктар адкрыў 3 новыя фірмы, каб падзяліць выручку.

Паводле закона маладыя кампаніі трапляюць пад спрошчаную сістэму падаткаабкладання, і на гэтым ён паспрабаваў атрымаць дадатковы даход сабе ў кішэню.

«Гэта дазволіла яму ў перыяд з 2022 па 2024 год падзяліць атрыманую выручку паміж падкантрольнымі суб’ектамі, занізіць падатковую базу і ўхіліцца ад уплаты падаткаў у бюджэт», — распавёў Андрэй Сеннікаў.

Такім чынам мазырчанін схаваў 2,5 млн рублёў.