Лекар развянчаў распаўсюджаны міф пра сняданак

• 11.11.2025, 13:25

Першы прыём ежы можна прапусціць?

Прапуск сняданку менш часта прыводзіць да парушэнняў абмену глюкозы і прыбаўкі ў вазе, чым няправільнае харчаванне цягам дня. Пра гэта распавёў эндакрынолаг Рыкарда Барозу у інтэрв’ю выданню Metropoles.

Лекар адзначыў, што адмову ад ежы раніцай часта звязваюць з высокай рызыкай рэзістэнтнасці да інсуліну. Гэта стан, пры якім клеткі арганізма становяцца менш успрымальнымі да інсуліну. Гэты гармон кантралюе ўзровень цукру ў крыві. У выніку органы і тканкі не атрымліваюць неабходнага харчавання, а ўзровень цукру ў крыві павышаецца.

«Рэзістэнтнасць да інсуліну і прыбаўка ў вазе ўзнікаюць не з-за адсутнасці сняданка. Значна важней якасць першага прыёму ежы: калі ён збалансаваны і ўключае карысныя прадукты, шкоды не будзе», — адзначыў Барозу.

Паводле слоў лекара, значна небяспечнейшая звычка «кампенсаваць» прапушчаны сняданак фаст-фудам, салодкасцямі або іншымі крыніцамі простых вугляводаў. Такі спосаб харчавання павышае ўзровень цукру ў крыві і з цягам часу сапраўды можа прывесці да рэзістэнтнасці да інсуліну.

Эксперт дадаў, што пры прапуску сняданка таксама павялічваецца рызыка пераядання цягам дня і ўвечары. Каб сфармаваць больш здаровыя харчовыя звычкі, варта пазбягаць кафеіну раніцай.

«Кава з цукрам нашча асабліва эфектыўна прыгнятае апетыт. Таксама раніцай у арганізме чалавека натуральным чынам павышаецца ўзровень картызолу — так званага «гармона стрэсу», які таксама часова зніжае пачуццё голаду. У ідэале дзень варта пачаць са шклянкі вады, а потым з’есці бялковую страву, напрыклад, ёгурт або яйкі», — падсумаваў лекар.