Беларус 193 разы здаў у арэнду жытло, якога насамрэч не існавала

• 10.11.2025, 22:28

Што было далей.

Суд Слонімскага раёна вынес прысуд мужчыне, які падмануў амаль 200 чалавек, здаючы ў арэнду неіснуючыя кватэры.

Як паведамілі ў Гродзенскім абласным судзе, у ліпені 2024 года мужчына ў Telegram змовіўся з невядомым саўдзельнікам. З ліпеня па жнівень яны размяшчалі фальшывыя аб’явы аб арэндзе жылля ў Гродзенскай вобласці.

Махляры бралі папярэднюю аплату як мінімум у 193 чалавек, але выконваць свае абавязанні не збіраліся. У выніку яны завалодалі грашыма пацярпелых на агульную суму не менш як 41,3 тысячы рублёў, якія потым падзялілі і патрацілі па ўласным меркаванні.

У судзе абвінавачаны цалкам прызнаў віну і заявіў пра раскаянне.

Паводле рашэння суда яму прызначана 6 гадоў пазбаўлення волі з адбываннем пакарання ў калоніі ўзмоцненага рэжыму. Акрамя таго, ён павінен выплаціць штраф у 100 базавых велічынь, кампенсацыю матэрыяльнай шкоды — 18,4 тысячы рублёў, маральнай — 175 рублёў, а таксама дзяржпошліну ў 7,2 тысячы рублёў.