The Guardian: Пуціна раздражняе тон Лаўрова падчас перамоваў

• 10.11.2025, 20:45

Кіраўнік МЗС РФ выстаўіў празмерна жорсткія патрабаванні ў размове з Рубіо.

Нягледзячы на спекуляцыі ў медыя, няма ніякіх прыкмет таго, што кіраўнік МЗС РФ Сяргей Лаўроў «патрапіў у апалу» Уладзіміра Пуціна. Але ён сапраўды кепска справіўся з размовай з дзяржаўным сакратаром ЗША Маркам Рубіо, піша The Guardian са спасылкай на расійскага чыноўніка, які раней займаў высокую пасаду ў Крэмлі.

Крыніца журналістаў кажа, што Пуцін наўрад ці звольніць Лаўрова, бо той яму верна служыць ужо дзесяцігоддзямі, а яго адсутнасць на публічных мерапрыемствах не сведчыць пра тое, што ён страціў ласку кіраўніка Крэмля. Аднак кіраўнік МЗС РФ сапраўды сапсаваў размову з Рубіо «дыпламатычным бязладдзем».

Паводле суразмоўцы выдання, Лаўроў выстаўіў бескампрамісны набор патрабаванняў падчас размовы, каб выглядаць патрыятычным у вачах Крэмля. Аднак гэтая пазіцыя ўрэшце аказалася контрпрадуктыўнай.

«Крыніца дадала, што Пуцін раней выказваў раздражненне ўсё больш канфрантацыйным тонам Лаўрова і яго ўсё меншай здольнасцю дэманстраваць дыпламатычнае майстэрства», — гаворыцца ў матэрыяле.

Адзначаецца, што саміт у Будапешце, які адмянілі пасля размовы Лаўрова і Рубіо, даў бы Пуціну яшчэ адну магчымасць настойваць на сваіх аргументах перад прэзідэнтам ЗША, які ў мінулым схіляўся да пазіцыі Масквы па Украіне пасля сустрэчы з кіраўніком Крэмля. Правядзенне сустрэчы таксама стала б істотнай сімвалічнай перамогай для Пуціна, падкрэсліваючы яго здольнасць свабодна падарожнічаць па Еўропе, нягледзячы на намаганні па яго ізаляцыі.

«Пуцін хацеў сустрэчы ў Будапешце, і роля Лаўрова не палягала ў тым, каб умешвацца», — кажа крыніца журналістаў.