Гэты беларускі прадукт прадаюць па 400 рублёў за кілаграм

• 10.11.2025, 12:43

«Залатыя» грыбы знайшлі ў продажы на Камароўскім рынку.

У Беларусі сушаныя грыбы прадаюцца на рынку па 400 рублёў за кілаграм, паведамілі на дзяржаўным тэлебачанні.

«Залатыя» грыбы знайшлі ў продажы на Камароўскім рынку. Прадаўцы рэалізуюць сушаныя грыбы па цане 40 рублёў за 100 грамаў або 400 рублёў за кілаграм. На ўпакоўках напісана, што гэта Белы грыб. Баравікі з'яўляюцца асабліва каштоўнымі грыбамі ў лесе, а цяпер, відаць, і на прылаўку.

Адзначаецца, што такая высокая цана сушаных баравікоў звязана менавіта з тым, што прадаюцца яны ў сушаным выглядзе. Маўляў, пры сушцы грыб губляе прыкладна 90% масы. І атрымліваецца, што той аб'ём грыбоў, які ў лесе важыў 10 кілаграмаў, пасля сушкі ператвараецца ў адзін кілаграм. Пры гэтым падчас гатавання, напрыклад у супе, грыбы зноў павялічваюцца ў памеры.

У Беларусі грыбы на зіму звычайна сушаць у печы або на спецыяльным абсталяванні. Пры гэтым сушаныя грыбы, якія прадаюцца на мінскай Камароўцы, таксама праходзяць лабараторны кантроль. На кожнай упакоўцы пра гэта напісана, а таксама пра тое, што перавышэння радыяцыі не выяўлена.

У сюжэце таксама сказана, што цяпер грыбоў на рынку няшмат, у асноўным прадаюць або свежыя, або салёныя. Попыт на сушаныя грыбы таксама ёсць.