«Калі Вешчы Алег кіраваў у Кіеве, то Масквы яшчэ не было»

• 10.11.2025, 9:49

Узброеныя сілы Украіны высмеялі найноўшы дрон расіян.

Зенітна-ракетны артылерыйскі дывізіён 67-й АМБр ЗСУ спусціў авіяцыю арміі РФ «з неба на зямлю», знішчыўшы па чарзе два расійскія БПЛА «Альбатрос», два «Суперкам», дзве «Маланкі», тры «Арланы» і адзін «Ланцет». Пікам паветранага бою стала знішчэнне новага расійскага дрона «Князь Вешчы Алег», які акупанты хваляць за нібыта «нябачнасць».

Відэа палявання механізаванай брыгады апублікавалі ў Facebook.

«Князь Вешчы Алег» яшчэ як мае быць не навучыўся лятаць, а мы яго ўжо збіваем, у акупантаў падгарае», – падкрэслілі ўкраінскія абаронцы.

Згаданы дрон з'яўляецца разведвальным; упершыню яго ўдалося збіць 63-й Асобнай механізаванай брыгадзе. Пасля паспяховага паражэння мэты старшы лейтэнант 63-й АМБр Ростыслаў Яшчышын высмеяў расійскіх стваральнікаў дрона, падкрэсліўшы, што «калі Вешчы Алег кіраваў у Кіеве, то Масквы яшчэ не было».