Спадарожнікавыя здымкі пацвярджаюць новы паспяховы ўдар па нафтабазе ў Крыме

• 1.11.2025, 23:28

Знішчана больш за трэць базы.

Пра атаку на нафтабазу ў пасёлку Гвардзейскае, што непадалёк ад Сімферопаля, стала вядома ў ноч на 29 кастрычніка. Амаль адразу ў сацсетках з'явіліся фота з вялікім слупом дыму, аднак было невядома, ці ўдалося паразіць менавіта нафтабазу, ці дым з'яўляецца наступствам гарэння збітага БПЛА.

NV атрымаў доступ да спадарожнікавых здымкаў ад 30 кастрычніка і 1 лістапада, якія пацвярджаюць паспяховае траплянне менавіта ў нафтабазу. Нягледзячы на тое, што з моманту трапляння мінула больш за суткі, удзень 30 кастрычніка на аб'екце яшчэ можна было ўбачыць значнае задымленне.

Крыніцамі дыму з'яўляюцца некалькі рэзервуараў у паўночна-ўсходняй частцы нафтабазы, куды, меркавана, прыйшлося траплянне.

Папярэдні аналіз сведчыць, што знішчаныя або істотна пашкоджаныя 4 рэзервуары з гаруча-змазачнымі матэрыяламі з 11, што існавалі на базе.

Такім чынам, знішчана каля 36% рэзервуараў. Яшчэ 29 кастрычніка крыніцы журналістаў пацвердзілі, што атаку на нафтабазы ў Крыме арганізавала СБУ. Акрамя гэтага, БПЛА паразілі ЗРК «Панцыр-С2» і дзве РЛС.

У выпадку з базай у Гвардзейскім — гэта ўжо другая паспяховая атака за некалькі тыдняў. Мінулы раз нафтабаза была паражаная 17 кастрычніка, тады аб'ект не маглі патушыць каля 2 сутак.

Нафтабаза ў Гвардзейскім належыць ТАА «Кедр», якое валодае найбольшай у акупаваным Крыме сеткай аўтазаправачных станцый ATAN (больш за 100 АЗС).