Расія Пуціна трашчыць па швах

• 1.11.2025, 15:30

Рэальная інфармацыя пра вайну ва Украіне пранікае нават праз цэнзуру.

Рэжым Пуціна становіцца ўсё больш крохкім, сцвярджае аналітык Джэймс Брук. Падставай для такой высновы стала рэакцыя ўладаў на антыпуцінскую песню 18-гадовай спявачкі Наоко: за выкананне радка «Калі цар памрэ — мы зноў будзем танцаваць» артыстку арыштавалі, а ёй пагражае крымінальны пераслед, піша National Security Journal (пераклад — сайт Charter97.org).

«Па вызначэнні, моцны лідар не дрыжыць пры выглядзе спяваючых дзяўчат-падлеткаў», — піша Брук. Страх перад Крэмлём у грамадстве згасае. На канцэрты Наоко прыходзяць сотні маладых расіян — прыкмета таго, што людзі перастаюць баяцца адкрыта крытыкаваць уладу.

Не толькі моладзь, але і ідэолагі рэжыму прызнаюць крызіс. Вядомы філосаф-пуцініст Аляксандр Дугін, якога лічаць натхняльнікам крэмлёўскай ідэалогіі, параўнаў цяперашнюю Расію з «курыцай без галавы» і правёў паралель з распадам СССР: «Тады таксама ўсё, нібыта, было пад кантролем — партыя, КДБ, армія — але галавы не было. Нешта падобнае набліжаецца цяпер».

Такія словы фактычна азначаюць прызнанне — сістэма Пуціна страчвае сэнс і кіравальнасць. Яго культ «моцнага мужчыны» руйнуецца. Састарэлы і ізаляваны лідар усё больш нагадвае рускага цара Мікалая II, пры якім Расія абрынулася пад цяжарам вайны і ўнутраных супярэчнасцей.

Паводле звестак праваабаронцаў, колькасць палітвязняў з антываеннымі поглядамі расце, і сярод іх — усё больш прадстаўнікоў рабочага класа. Гэта сведчыць пра тое, што рэальная інфармацыя пра вайну ва Украіне пранікае нават праз цэнзуру.