Дэбютаваў самы экстравагантны электрамабіль Toyota

• 1.11.2025, 11:37

400 конскіх сіл і велізарнае антыкрыло.

Электрамабіль Toyota bZ атрымаў экстрэмальную версію Time Attack. Кросовер падрыхтавалі да гонкаў на час.

Новая Toyota bZ Time Attack з 4 па 8 лістапада будзе дэманстравацца ў Лас-Вегасе на цюнінг-шоу SEMA. Пра гэта паведамляецца на сайце японскага аўтавытворцы.

Як відаць з назвы, электрамабіль Toyota bZ падрыхтавалі да спаборніцтваў Time Attack — колавых гонкаў на час. Кросовер ператварыўся ў спорткар.

За аснову ўзялі абноўлены кросовер Toyota bZ 2025 года ў поўнапрывадным выкананні. Пасля дапрацовак магутнасць яго двухрухавіковай устаноўкі ўзрасла з 338 да больш як 400 конскіх сіл.

Акрамя таго, новая Toyota bZ Time Attack атрымала спартыўную падвеску ад TEIN і тармазы Alcon, пазычаныя ў гоначнай Toyota GR86 Cup.

Кросовер Toyota bZ сур'ёзна занізілі, дадалі карбонавы абвес, дыфузар і гіганцкае антыкрыло. Акрамя таго, устанавілі 19-цалевыя літыя дыскі BBS з нізкапрофільнымі шынамі. Continental Extreme Contact Sport 02 305/30 ZR19.

З салона Toyota bZ прыбралі аздабленне, заднія сядзенні і шумаізаляцыю. Замест гэтага ўсталявалі спартыўныя пярэднія крэслы OMP HTE-R і каркас бяспекі.