У Салігорску хлопец зарабіў «крыміналку», стоячы ў чарзе на флюараграфію

• 9.10.2025, 21:49

Падрабязнасці.

У Салігорску 18-гадовы хлопец стаў фігурантам крымінальнай справы пасля таго, як у паліклініцы напаў на наведвальніка і разбіў яго смартфон, паведамілі ва УУС.

Прычынай агрэсіі стала тое, што мужчына гуляў у анлайн-казіно, стоячы ў чарзе на флюараграфію. Па звестках міліцыі, малады чалавек рэзка адрэагаваў на ўбачанае: ён выбіў iPhone 16 з рук уладальніка, а затым нанёс удар самаму мужчыну. Смартфон аказаўся разбітым, а пацярпелы атрымаў цялесныя пашкоджанні.

Інцыдэнт кваліфікавалі як хуліганства. У адносінах да маладога чалавека ўзбудзілі крымінальную справу па ч. 1 арт. 339 КК. Максімальнае пакаранне паводле гэтага артыкула — пазбаўленне волі на тры гады.