На мінскай Нямізе маршрутка ўляцела ў слуп

• 9.10.2025, 18:41

Пацярпелі двое пасажыраў.

Сур'ёзнае ДТЗ адбылося ў Мінску з удзелам маршрутнага таксі Mercedes. Двое чалавек атрымалі траўмы, піша Telegram-канал «УДАІ ГУУС Мінгарвыканкама».

Паводле папярэдняй інфармацыі, кіроўца мікрааўтобуса адцягнуўся ад кіравання транспартным сродкам. Праявіўшы неўважлівасць, ён позна заўважыў, што аўтамабіль перад ім пачаў запавольвацца і, спрабуючы пазбегнуць сутыкнення, перабудаваўся.

У выніку мужчына не справіўся з кіраваннем, выехаў з праезнай часткі і ўрэзаўся ў святлафор. Услед за гэтым з маршруткай сутыкнуўся аўтамабіль Tesla, які ехаў ззаду.

У выніку аварыі двое пасажыраў былі дастаўленыя ў медыцынскую ўстанову для абследавання.

Супрацоўнікі ДАІ працуюць на месцы здарэння для высвятлення іншых абставін таго, што адбылося.