Літва абмяжуе аб’ём паліва ў баках аўтамабіляў, што едуць з Беларусі

• 9.10.2025, 11:43

Вільнюс хоча змагацца з кантрабандай.

Літва разглядае магчымасць абмежавання аб’ёму паліва, якое можна ўвозіць у краіну ў баках аўтамабіляў, што едуць з Беларусі. Ідзе гаворка пра ліміт у 200 літраў. Пра гэта паведаміў міністр фінансаў Крыступас Вайтэкунас, перадае Delfi.

Такая мера можа з’явіцца дзеля барацьбы з незаконным увозам дызельнага паліва ў Літву з Беларусі.

«Значны аб’ём дызельнага паліва ўвозіцца з трэціх краін, у прыватнасці з Беларусі, і мы вырашылі, што з гэтым можна змагацца, абмяжоўваючы колькасць дызельнага паліва, якое ўвозяць у баках. Гэта мера аналагічная той, якую выкарыстоўваюць нашыя суседзі ў Польшчы і Латвіі. Калі бак грузавіка ёмістасцю ў адну або нават паўтары тоны, такое абмежаванне можа быць карысным, бо не сакрэт, што паліва не абавязкова расходуецца падчас паездкі грузавіка», — сказаў на пасяджэнні парламенцкага камітэта па бюджэце і фінансах Крыступас Вайтэкунас.

Мытны дэпартамент Літвы адзначыў, што 90% грузавікоў, якія ўязджаюць у краіну, перасякаюць мяжу з поўнымі бакамі, але пры выездзе як з латвійскага, так і з літоўскага боку іх бакі ўжо паўпустыя.