Названы просты спосаб палепшыць кагнітыўныя функцыі ў пажылых людзей

• 8.10.2025, 21:10

Дапаможа інтэрнэт.

Пажылыя людзі, якія ўмеюць карыстацца інтэрнэтам і лічбавымі тэхналогіямі, дэманструюць больш высокі ўзровень кагнітыўных здольнасцей і радзей пакутуюць ад дэпрэсіі. Да такой высновы прыйшла міжнародная каманда вучоных. Праца апублікавана ў часопісе Journal of Psychiatric Research (JPR).

Навукоўцы прааналізавалі дадзеныя больш за 9 тысяч удзельнікаў маштабнага кітайскага праекта China Health and Retirement Longitudinal Study, які ахоплівае жыхароў 28 правінцый краіны ва ўзросце ад 45 гадоў. Удзельнікаў падзялілі на дзве групы — тых, хто рэгулярна карыстаўся лічбавымі тэхналогіямі (прагляд навін, перапіска, відэа, анлайн-гульні, фінансавыя сэрвісы), і тых, хто цалкам абыходзіўся без інтэрнэту.

Вынікі паказалі, што пажылыя людзі, якія карыстаюцца лічбавымі тэхналогіямі, мелі больш высокі ўзровень памяці і канцэнтрацыі ўвагі, а таксама лепш спраўляліся з задачамі, якія патрабуюць планавання і шматзадачнасці. У астатніх удзельнікаў, наадварот, часцей назіраліся прыкметы кагнітыўнага зніжэння і выяўленыя сімптомы дэпрэсіі.

Паводле аўтараў, гэтыя дадзеныя пацвярджаюць важную ролю лічбавай пісьменнасці ў пажылым узросце. У сучасным грамадстве, дзе значная частка зносін і атрымання інфармацыі адбываецца анлайн, неўменне карыстацца лічбавымі сродкамі вядзе да сацыяльнай ізаляцыі, якая, у сваю чаргу, можа ўзмацняць дэпрэсіўныя засмучэнні і паскараваць кагнітыўны спад.