Сусветны банк прадказаў эканоміцы Расіі трохгадовы застой

• 7.10.2025, 19:10

Падрабязнасці.

Запавольванне эканомікі — гэта не «кіруемае астуджэнне», як кажуць у ўрадзе, а ўваход у застой, вынікае з абноўленага прагнозу Сусветнага банка. Ён чакае, што да 2028 г. эканамічны рост у Расіі не перавысіць 1%. У параўнанні з чэрвеньскай версіяй чаканы рост ВУП зніжаны з 1,4% да 0,9% у гэтым годзе, з 1,2% да 0,8% у наступным і з 1,2% да 1% у 2027 г., перадае The Moscow Times.

Пагоршана большасць асноўных параметраў. СБ чакае скарачэння інвестыцый ужо па выніках гэтага года (на 0,4%), у наступным годзе яны змяншацца на 0,2% і вернуцца да росту толькі ў 2027 г. (1,1%). Запаволіцца рост спажывання, асабліва прыватнага — яно будзе расці крыху больш чым на 1% у год.

Рабіць прагнозы расійскай эканомікі цяпер складана, прызнае СБ: вайна яе моцна змяніла, а многія даныя сталі недаступныя. Але яго эксперты не бачаць фактараў, якія дазволілі б пазбегнуць застою. Цэны на нафту ўпалі, а разам з імі — экспарт і даходы бюджэту. Пры гэтым дзяржаўныя выдаткі стабілізаваліся — больш не варта разлічваць на бюджэтны стымул, а прыватны попыт і інвестыцыі падрываюцца высокімі стаўкамі, адзначае СБ. Да таго ж дэфіцыт кадраў будзе і далей абмяжоўваць рост.

СБ не падзяляе аптымізму ўладаў наконт скарачэння бюджэтнага дэфіцыту. Мінфін чакае «дыру» ў 2,6% ВУП у гэтым годзе і яе паступовага зніжэння да 1,6% у наступным і да 1,2–1,3% у 2027–2028 гг. Паводле прагнозу СБ, у гэтым годзе дэфіцыт складзе 2,9% ВУП, а наступныя два гады будзе крыху меншы — 2,7% ВУП.

Затое СБ верыць у поспех у барацьбе з інфляцыяй: яго прагноз — 7,5% у гэтым годзе, 4,5% у 2026-м і 4% у 2027-м.

Іншыя эксперты таксама паступова зніжаюць чаканні адносна расійскай эканомікі. Блізкі да ўладаў аналітычны цэнтр ЦМАКП у верасні пагоршыў прагноз росту з 1–1,4% да 0,7–1% у гэтым годзе, з 1,5–1,8% да 1,4–1,7% у наступным, з 1,8–2,2% да 1,3–1,7% у 2027 г. і з 1,9–2,3% да 1,5–1,9% у 2028 г. Жнівеньскі кансенсус-прагноз Цэнтра развіцця ВШЭ — рост на 1,2% у гэтым годзе, 1,4% у наступным і 1,7% у 2027–2028 гг. Кансенсус 33 аналітыкаў, апытаных Цэнтрабанкам (намеснік старшыні ЦБ Аляксей Заботкін назваў яго «другім меркаваннем» для рэгулятара), у верасні таксама быў пагоршаны: 1,2% у гэтым годзе, 1,6% у наступным і 1,9–2% у 2027–2028 гг. Галоўная эканамістка «Т-інвестыцый» Соф’я Данець прагназуе рост ВУП у гэтым і наступным годзе ніжэй за 1%.