Reuters: Беларусь у чатыры разы павялічыла экспарт бензіну ў Расію

• 7.10.2025, 19:03

РФ сутыкнулася з сур’ёзным дэфіцытам паліва.

Экспарт бензіну з Беларусі ў Расію па чыгунцы вырас у верасні ў чатыры разы ў параўнанні з папярэднім месяцам. Прычынай стаў дэфіцыт паліва ў РФ з-за ўкраінскіх атак на яе энергетычную інфраструктуру.

Пра гэта паведамляе Reuters.

Як адзначае агенцтва, некалькі расійскіх абласцей увялі нармаванне і часова замарозілі цэны на паліва ў апошнія тыдні з-за дэфіцыту папулярных відаў бензіну, які ўзнік у выніку ўдараў дронаў.

Акрамя таго, Масква абмежавала экспарт бензіну і дызельнага паліва. Таксама Расія летась павялічыла імпарт паліва з Беларусі, каб пакрыць дэфіцыт.

Крыніцы Reuters паведамілі, што пастаўкі бензіну па чыгунцы з беларускіх нафтаперапрацоўчых заводаў на ўнутраны рынак РФ у мінулым месяцы выраслі да 40 тысяч метрычных тон, або 14 500 барэляў у суткі. Пастаўкі дызельнага паліва ў верасні склалі 33 тысячы тон.

У той жа час транзіт бензіну з Беларусі для далейшага экспарту праз расійскія парты ў мінулым месяцы вырас прыблізна на 1% да 140 000 тон.

Беларусь выкарыстоўвае расійскія парты для перавалкі сваіх нафтапрадуктаў з сакавіка 2021 года ў адпаведнасці з пагадненнем аб супрацоўніцтве, падпісаным паміж Масквой і Мінскам.

Словы крыніц і разлікі Reuters сведчаць, што такія перавалкі ў студзені—верасні скараціліся амаль на 40% у гадавым выражэнні да 1,17 млн тон у выніку зніжэння аб’ёмаў перапрацоўкі нафты.

Агенцтва адзначае, што два нафтаперапрацоўчыя заводы Беларусі — «Нафтан» і Мазырскі — маюць гадавую магутнасць 12 млн тон кожны, або каля 240 000 барэляў у суткі. Але звычайна яны вырабляюць каля 9 млн тон у год, або прыблізна 180 000 барэляў у суткі.