СМІ: сілавікі Лукашэнкі катавалі экс-афіцэра Мінабароны Афганістана

• 7.10.2025, 17:59

Яму ампутавалі руку.

Былы афіцэр элітных падраздзяленняў Міністэрства абароны Афганістана Джихад Мохаммад Гул Навайе быў затрыманы і падвергнуты катаванням беларускімі сілавікамі. Цяпер ён знаходзіцца пад наглядам у бальніцы, паведамляе 8am.media.

Крыніцы паведамілі выданню Hasht-e Subh Daily ў нядзелю, 5 кастрычніка, што Навайе быў вымушаны пакінуць Афганістан нелегальнымі маршрутамі пасля прыходу да ўлады талібаў з-за пагрозы бяспецы.

Паводле слоў крыніц, пасля жорсткіх катаванняў і працяглага ўтрымання пад вартай бяз увагі з боку ўладаў, ягоная рука пачарнела ад траўмы і ў выніку была ампутаваная ў бальніцы.