«Ваша мужнасць — моцны сімвал»

• 7.10.2025, 14:35

Еўрадэпутаты накіруюць ліст падтрымкі Анджэю Пачобуту.

У будынку Еўрапейскага парламента ў Страсбургу ідзе збор подпісаў для адпраўкі калектыўнага ліста беларускаму палітвязню, лідару польскай дыяспары ў Беларусі Анджэю Пачобуту. Аўтаркай ініцыятывы выступіла кіраўніца дэлегацыі Еўрапарламента па сувязях з Беларуссю, еўрадэпутатка з Польшчы Малгажата Гасеўска.

Сайт Charter97.org публікуе тэкст ліста:

«Дарагі Анджэй, шаноўны сябра!

Мы пішам вам з глыбокай салідарнасцю і шчырымі перажываннямі. Мы пастаянна думаем пра вас і іншых палітвязняў. Ваша мужнасць — моцны сімвал барацьбы за справядлівасць і свабоду.

Няхай гэтыя словы прынясуць вам крыху надзеі. Мы працягваем маліцца і дзейнічаць дзеля таго дня, калі вы зноў зможаце ўз’яднацца з вашымі блізкімі. Вы застаецеся з намі ў думках і духам.

З найглыбейшай павагай і салідарнасцю», — гаворыцца ў лісце.

Анджэй Пачобут — вядомы гродзенскі журналіст, адзін з лідараў Саюза палякаў у Беларусі. Ён быў затрыманы 25 сакавіка 2021 года, асуджаны на 8 гадоў калоніі ўзмоцненага рэжыму за «заклікі да санкцый» і «распальванне варожасці».

У сакавіку 2024 года польская рэдакцыя амерыканскага выдання Newsweek узнагародзіла Пачобута прэміяй імя Тэрэсы Тараньскай у намінацыі «Постаць дзесяцігоддзя».